Kif jaħdem

Il-MAE hu talba minn awtorità ġudizzjarja f'pajjiż tal-UE għall-arrest ta' persuna f'pajjiż ieħor u biex tiġi ċeduta għall-prosekuzzjoni, jew għall-eżekuzzjoni ta' priġunerija jew ordni ta' detenzjoni fl-ewwel pajjiż. Il-mekkaniżmu huwa bbażat fuq il-prinċipju ta' rikonoxximent reċiproku tad-deċiżjonijiet ġudizzjarji. Huwa jopera fil-pajjiżi kollha tal-UE

Huwa jopera permezz ta' kuntatti diretti bejn l-awtoritajiet ġudizzjarji.

Fl-applikazzjoni tal-mandat, l-awtoritajiet iridu jirrispettaw id-drittijiet proċedurali tal-persuni suspettati jew akkużati – bħad-dritt għall-informazzjoni, id-dritt għal avukat, u possibbilment għal interpretu, u għall-għajnuna legali kif stipulat mil-liġi fil-pajjiż fejn ikunu ġew arrestati.

Kif inhu differenti mill-estradizzjoni tradizzjonali?

1. Termini stretti
   Il-pajjiż fejn il-persuna tiġi arrestata jrid jieħu deċiżjoni finali dwar l-eżekuzzjoni tal-mandat ta' arrest Ewropew fi żmien 60 jum mill-arrest tal-persuna.
   Jekk il-persuna tagħti l-kunsens tagħha għaċ-ċessjoni, id-deċiżjoni taċ-ċessjoni trid tittieħed fi żmien 10 ijiem.
   Il-persuna rikjesta trid tiġi ċeduta mill-aktar fis f’data miftiehma bejn l-awtoritajiet ikkonċernati, u mhux aktar tard minn għaxart (10) ijiem mid-deċiżjoni finali dwar l-eżekuzzjoni tal-mandat ta' arrest Ewropew.
2. Verifika ta’ kriminalità doppja – mhux aktar meħtieġa għal
   32 kategorija ta' reati, ma hemm l-ebda verifika dwar jekk l-att huwiex reat kriminali fiż-żewġ pajjiżi. L-uniku rekwiżit hu li jkun iġorr piena ta' perjodu massimu ta’ mill-inqas tliet (3) snin priġunerija fil-pajjiż li joħroġ il-mandat.
   Għal reati oħra, iċ-ċediment jista’ jkun suġġett għall-kundizzjoni li l-att jikkostitwixxi reat fil-pajjiż eżekutur.
3. Ebda involviment politiku
   Id-deċiżjonijiet jittieħdu mill-awtoritajiet ġudizzjarji waħedhom, mingħajr ebda konsiderazzjoni politika involuta.
4. Ċessjoni ta' ċittadini
   Il-pajjiżi tal-UE ma għadhomx jistgħu jirrifjutaw li jċedu liċ-ċittadini tagħhom, sakemm ma jeżegwux is-sentenza ta' priġunerija huma stess kontra l-persuna riċerkata.
5. Garanziji
   Il-pajjiż li jeżegwixxi l-MAE jista' jirrikjedi garanziji li:
   a. wara ċertu perjodu l-persuna jkollha d-dritt li titlob reviżjoni, jekk il-piena imposta tkun ta' għomor priġunerija.
   b. il-persuna riċerkata tista' sservi kwalunkwe żmien ta' priġunerija li jirriżulta fil-pajjiż eżekutorju, jekk tkun ċittadina jew residenti abitwali f'dak il-pajjiż.

Raġunijiet limitati għal ċaħda
Pajjiż jista' jiċħda ċ-ċessjoni tal-persuna mitluba biss jekk tapplika waħda mir-raġunijiet għal ċaħda obbligatorja jew fakultattiva:
Raġunijiet obbligatorji

• il-persuna kienet diġà ġġudikata fuq l-istess reat (ne bis in idem)
• minuri (il-persuna ma tkunx għadha laħqet l-età ta' responsabilità penali fil-pajjiż eżekutorju)
• amnestija (il-pajjiż eżekutorju seta' jipproċedi kontriha, u r-reat huwa kopert minn amnestija f'dak il-pajjiż).

Raġunijiet fakultattivi – bħal:

• nuqqas ta’ kriminalità doppja għal reati oħra barra mit-32 reat elenkat fl-Artikolu 2(2) tad-Deċiżjoni Qafas dwar il-MAE
• ġuriżdizzjoni territorjali
• proċedura kriminali pendenti fil-pajjiż eżekutorju
• preskrizzjonijiet, eċċ.

Manwal dwar Kif Jinħareġ u Jiġi Eżegwit MAE

Il-Kummissjoni Ewropea ppubblikat Manwal dwar Kif Jinħareġ u Jiġi Eżegwit Mandat ta' Arrest Ewropew   (2002 Kb) , biex tiġi ffaċilitata u ssimplifikata l-ħidma ta’ kuljum tal-awtoritajiet ġudizzjarji kkonċernati. Il-Manwal jipprovdi gwida dettaljata dwar il-passi proċedurali għall-ħruġ u l-eżekuzzjoni ta’ MAE. Il-Manwal jipprovdi wkoll spjegazzjoni sħiħa tal-każistika l-aktar importanti tal-Qorti tal-Ġustizzja tal-Unjoni Ewropea li tinterpreta dispożizzjonijiet partikolari tad-Deċiżjoni Qafas dwar il-MAE.

Il-manwal bil-lingwi kollha jista’ jinstab hawn: BG  (2700 Kb) , CS  (1854 Kb) , DA  (1766 Kb) , DE  (1659 Kb) , ET  (1783 Kb) , EL  (2439 Kb) , ES  (1649 Kb) , FR  (1892 Kb) , HR  (1789 Kb) , IT  (2141 Kb) , LV  (2158 Kb) , LT  (1865 Kb) , HU  (1908 Kb) , MT  (2560 Kb) , NL  (2047 Kb) , PL  (2200 Kb) , PT  (1968 Kb) , RO  (1926 Kb) , SL  (1797 Kb) , SK  (1977 Kb) , FI  (2172 Kb) , SV  (1591 Kb) .

Statistika dwar l-użu ta' MAE

Fl-2019, bħala medja, il-persuni mfittxija ġew ċeduti:

• b’kunsens - fi 16,7-il jum
• mingħajr kunsens - f’55,75 jum.

Fl-2018, bħala medja, il-persuni mfittxija ġew ċeduti:

• b’kunsens - fi 16,4-il jum
• mingħajr kunsens - f’45 jum.

Risposti għall-kwestjonarju dwar il-MAE: 2014 | 2015 | 2016 | 2017 | 2018 | 2019

Id-data mhix disponibbli għall-pajjiżi kollha; madankollu, id-data tal-MAE li nħarġu hija kompluta għall-2015, 2016 u 2017.

	2014	2015	2016	2017	2018	2019
Maħruġin	14 948	16 144	16 636	17 491	17 471	20 226
MAE eżegwiti	5 535	5 304	5 812	6 317	6 976	5 665

Proġetti ffinanzjati taħt il-Programm Ġustizzja

Il-proġett ta’ riċerka InAbsentiEAW huwa studju legali komparattiv fil-Mandati ta’ Arrest Ewropej relatati ma’ persuni li ma kinux preżenti fil-proċedimenti li wassal għall-kundanna tagħhom (proċedimenti in absentia). Il-prattika turi li ta’ spiss ikun hemm problemi fil-ħruġ u fl-eżekuzzjoni ta’ tali MAE. L-għan tal-proġett ta’ riċerka kien li jiġu analizzati l-kawżi għal dawn il-problemi u li jiġu fformulati standards komuni għall-ħruġ ta’ tali MAE sabiex tiġi żgurata l-eżekuzzjoni tajba u ġusta tagħhom. Ir-riċerka twettqet permezz ta’ studji ta’ każijiet mill-Belġju, l-Ungerija, l-Irlanda, in-Netherlands, il-Polonja u r-Rumanija.

Ħoloq relatati

Deċiżjoni Qafas dwar il-Mandat ta' Arrest Ewropew